අතිපූජ්‍ය කිරිබත්ගොඩ ඤාණානන්ද ස්වාමීන් වහන්සේ විසින් ආනන්ද මහරහතන් වහන්සේගේ ජීවන චරිතය අළලා රචනා කරන ලද ‘සම්බුදු සුවඳේ පහස ලත් අනඳ මහතෙරණුවෝ’ නවතම ග්‍රන්ථය 2024 අගෝස්තු මස 24 වන දා පොල්ගහවෙල මහමෙව්නාව භාවනා අසපුවේදී එළිදක්වන ලදී. එම උතුම් උත්සව අවස්ථාවේදී අතිපූජ්‍ය කිරිබත්ගොඩ ඤාණානන්ද ස්වාමීන් වහන්සේ, පූජ්‍ය පොල්පිටිමූකලානේ පඤ්ඤාසිරි ස්වාමීන් වහන්සේ සහ පූජ්‍ය වැලිමඩ සද්ධාසීල ස්වාමීන් වහන්සේ විසින් මේ ග්‍රන්ථයේ විශේෂත්වය ගැනත් ආනන්ද මහරහත් මුනිඳුන්ගේ උතුම් ගුණ වරුණත් ඇසුරෙන් ධර්මානුශාසනාවන් පවත්වන්නට යෙදුනි. එමෙන්ම ථේරගාථා පාළියේ සඳහන් ආනන්ද මහරහතන් වහන්සේ වදාළ ගාථාවන් මනරම් පසුබිම් වාදනයක් ද සමග පූජ්‍ය කිරිබත්ගොඩ ඤාණානන්ද ස්වාමීන් වහන්සේගේ හඬින් සියලු දෙනාට ම ශ්‍රවණය කරන්නට අවස්ථාව උදාවිය.
අප භාග්‍යවතුන් වහන්සේට විසිපස් වසරක් උවටැන් කළ, සෙවණැල්ලක් සේ වැඩසිටි, සුපූජනීය අනඳ මහරහතන් වහන්සේගේ අසිරිමත් ගුණ කදම්බය ඇතුළත් මෙම සොඳුරු පොත් වහන්සේ ඔබට දැන් මහමෙව්නාව භාවනා අසපු ශාඛාවලින් හා මහාමේඝ ප්‍රකාශකයෝ වෙබ් අඩවියෙන් ලබාගත හැකියි.
ගෞතම බුදුසසුනෙහි වැඩසිටි, සසර දුක් අවසන් කළ, නිකෙලෙස් පිරිසිදු සිත් ඇති, උතුම් රහතන් වහන්සේලා විසින් පැවසූ උදාන ගාථාවන් ඇතුළත් වන්නේ සූත්‍ර පිටකයේ, ඛුද්දක නිකායට අයත්‍ ථේරගාථා පාළියෙහි ය. එම ග්‍රන්ථය පූජ්‍ය කිරිබත්ගොඩ ඤාණානන්ද ස්වාමීන් වහන්සේ විසින් ‘ඒ අමා නිවන් දුටු රහතන් වහන්සේලා‘ නමින් සිංහලට පරිවර්තනය කොට ඇත. එම ග්‍රන්ථයේ සඳහන් අපගේ භාග්‍යවතුන් වහන්සේගේ අග්‍ර උපස්ථායක වූ, මේ බුදුසසුනේ අගතනතුරු පහක් දරා වැඩසිටි අනඳ මහතෙරුන් වහන්සේ විසින් පැවසූ ගාථාවන් ය මියුරු පසුබිම් වාදනයක් ද සමග පූජ්‍ය කිරිබත්ගොඩ ඤාණානන්ද ස්වාමීන් වහන්සේගේ හඬින් ඔබට මෙයින් අසන්නට ලැබෙන්නේ.
