පූජ්‍ය කිරිබත්ගොඩ ඤාණානන්ද ස්වාමීන් වහන්සේ විසින් 2016 දෙසැම්බර් මස 31 වෙනි දින කඩුවෙල මහමෙව්නාව භාවනා අසපුවේ දී පවත්වන්නට යෙදුණු ධර්ම දේශනය
ශ්‍රද්ධා රූපවාහිනිය පවත්වන්න ඔබ සියළු දෙනා දායක වුන අය. දායක වුනේ මොකටද? සත්පුරුෂයකු පවත් වන්නයි. සත්පුරුෂයකු පවත්වන්නයි මේ ඔබ උදව් කළේ. ගෙවල් වල ඉන්නවා බොහෝම අසරණ අය. ඒ කියන්නේ සමහර අය ඉන්නවා කල්පනාව හොදට තියෙනවා ඇවිදින්න බෑ. රෝද පුටුවේ යනවා. සමහර අය ඉන්නවා ඈත දුර යන්න බෑ. ඒගොල්ලො සාමාන්‍යයෙන් විවේක වෙලාවට වාඩිවෙලා ටීවි එක දාගෙන ඉන්නවා. ටිවි එකේ සත්පරුෂහා හිටියොත් හරි. ටීවි එකෙන් අසත්පුරුශයා අවොත් අරයා සුන් නේද? ඇයි හේතුව අසත්පුරුෂයා ආශ්‍රය කරන්න ලැබුණොත් කොහේ වුණත් ගුණ ධර්ම පිහිටන්නේ නෑ.
ඔබ අහල ඇති අපගේ බුදුරජාණන් වහන්සේ ලගට ඇවිදිල්ලා ආනන්ද ස්වාමීන් වහන්සේ දවසක් කිව්වා ස්වාමීනී භාග්‍යවතුන් වහන්ස මට හිතෙන්නේ මේ බුද්ධ ශාසනෙන් භාගයක්ම තියෙන්නේ කළ්‍යාණ මිත්‍රයන් නිසා කියලා කිව්වා. බුදුරජාණන් වහන්සේ වදාළා ආනන්ද එහෙම කියන්න එපා. මේ බුද්ධ ශාසනේ සම්පූර්ණයෙන්ම තියෙන්නේ කළ්‍යාණ මිත්‍රයන් නිසා කිව්වා. එහෙම නම් අසත්පුරුෂයන්ගෙන් පාප පුද්ගලයන්ගෙන් බුද්ධ ශාසනේ රැකෙන්න විදියක් නෑ. බුද්ධ ශාසනේ පවතින්නේ සත්පුරුෂයන් මතයි. අන්න ඒ සත්පුරුෂ සම්බන්ධය ලබා දෙන්නයි ශ්‍රද්ධා මාධ්‍යයෙන් අපි එකතු වුනේ. එතකොට පින්වත්නි සත්පුරුෂයෙක් තමයි ලෝකෙට යහපත සලස්වන්නේ අසත්පුරුෂයෙක් නෙමෙයි. එතකොට බුදුරජාණන් වහන්සේ අපිට මහාමංගල සූත්‍රයේදී දේශණා කරපු පළමු වැනි මංගල කාරණය මොකක්ද? බාලයන් ආශ්‍රයට යන්න එපා කිව්වා. ඊලග එක මොකක්ද නැණවතුන් ආශ්‍රය කළොත් පිදිය යුත්තන් පුදනවා. මෙන්න මේ කරුණු ගෞතම බුද්ධ ශාසනේ පිහිට ලබන්න උපකාරී වෙනවා.සත්පුරුෂ දහමේ හික්මවන සත්පුරුෂ ඇසුර
මං ඔබට ඒකට උපකාරී වන ලස්සන ජාතක කතාවක් කියලා දෙන්නම්. බුදුරජාණන් වහන්සේගේ කාළේ සැවැත්නුවර එක උපාසක කෙනෙක් ඒ කියන්නේ ඒ උපාසක සෝවාන් ඵලයට පත්වුණු උපාසක කෙනෙක්. ඒ උපාසක භාග්‍යවතුන් වහන්සේව බැහැ දකින්න ඈත පළාතක ඉදලා එනවා. එද්දි හවස් වුනා. හවස් වුනාම සැවැත්නුවර මැද්දෙන් ගලාගෙන ගියා ගංගාවක්. මොකක්ද ඒකේ නම අචිරවතී. ඒ කාළේ මිනිස්සුන්ව එහාට මෙහාට ගගෙන් එතෙර කරවන්න ඔරු පාරු සේවයක් තිබ්බා. හවස් වෙද්දි ගගෙන් එහා පැත්තේ අර මනුස්සයා ඉන්නවා. මේ පැත්තේ මිනිස්සුන්ගෙන් ඇහුවා? මොකද එන්නේ නැත්තේ ප්‍රමාද කියලා ඇහුවා. ඒ ගොල්ලෝ ඔක්කොම ඔරු පාරු නවත්තලා බණ අහන්න ගිහින් කිව්වා. බලන්න ඒ කාළේ මිනිස්සු. එතකොටම මෙයාට මතක් වුනේ ධර්මයයි. කාටද අර උපාසකට. ධර්මය මතක් වෙනකොටම මතක් වුණා ශාස්තෘණ් වහන්සේව.
මතක් වෙලා මෙයා මෙනෙහි කරන්න ගත්තා. අනේ එහෙනම් බුදුරජාණන් වහන්සේ දැන් බණ කියනවා ඇති. මොනතරම් මධුර වූ ධර්ම කතාවක් පවත්වනවා ඇත්ද? මොන තරම් මිහිරි ධර්මයක් මේ වෙලාවේ භාග්‍යවතුන් වහන්සේ දේශණා කරනවා ඇත්ද? රාග ද්වේශ මෝහයන්ගෙන් නිදහස් වෙන ඒ උතුම් ධර්මය මාගේ ශාස්තෘණ් වහන්සේ කොච්චර ලස්සනට දේශණා කරනවා ඇත්ද? කියමින් භාග්‍යවතුන් වහන්සේ ගැන මේ උපාසක මෙනෙහි කරන්න ගත්තා.
Leave A Comment