"පින්වන්ත දරුවන් ලබන්නට නම්" ගැබිණි මව්වරුන්ගේ සදහම් වැඩසටහන් මාලාවේ පස් වන අදියර මාතර සමූපකාර සමිති ශාලාවේදී මැයි මස 20 වන දින පවත්වන්නට යෙදුණි. මේ තුළින් රැස් වූ සියලු පින් සියලු දෙනාම සතුටින් අනුමෝදන් වෙත්වා! උතුම් චතුරාර්ය සත්‍යය ධර්මය අවබෝධ කරගැනීමේ වාසනාව ලබත්වා!
බැර ලෝහ මිශ‍්‍ර අපිරිසිදු ජල පරිභෝජනය හේතුවෙන් අප මාතෘභූමියේ ප‍්‍රදේශ ගණනාවක පැතිර යන වකුගඩු අක‍්‍රීය වීමේ මාරාන්තික රෝගයෙන් පීඩාවට පත් අපේම සහෝදර ජනතාවගේ ජීවිත ඉන් සුරක්ෂිත කරනු පිණිස මහමෙව්නාව භාවනා අසපු සංචිතයත් ශ‍්‍රද්ධා රූපවාහිනියත් සිවිල් ආරක්ෂක දෙපාර්තමේන්තුවත් මගින් ක‍්‍රියාත්මක කරන ශ‍්‍රද්ධා පිවිතුරු පැන් පූජා පුණ්‍ය ව්‍යාපෘතියේ සයවන අදියර යටතේ, පොළොන්නරුව දිස්ත‍්‍රික්කයේ ගිරිතලේගම, බැඳිවැව, සුහදපුර, යුදගනාව, කුමුදුපුර, මයිලගස්හන්දිය යන ගම්මානවල වෙසෙන දසදහසකට ආසන්න ගම්වාසීන් උදෙසා ඉදිකළ, රුපියල් ලක්ෂ 85ක වටිනාකමින් යුත් ජල පිරිපහදු මධ්‍යස්ථාන හයක් නිල වශයෙන් ජනතා අයිතියට පත් කිරීමේ පුණ්‍ය මහෝත්සවය අතිපූජනීය මහා සංඝරත්නයේ ආශිර්වාද මධ්‍යයේ සිවිල් ආරක්ෂක දෙපාර්තමේන්තුවේ අධ්‍යක්ෂ ජනරාල් චන්ද්‍රරත්න පල්ලේගම මහතාගේ ප‍්‍රධානත්වයෙන් 2018 මැයි 14, 15 යන දෙදින එම ගම්මානවලදී පැවැත්විණි.
පින්බර වෙසක් මාසයේ භාග්‍යවතුන් වහන්සේගේ උතුම් ත්‍රෛමංගල්‍යයට උපහාර පිණිස අන්සාන් මහමෙව්නාව භාවනා අසපුව මගින් සංවිධානය කරනු ලැබු අසිරිමත් වෙසක් සදහම් මංගල්‍යය මැයි මස 06 වන දින දී අන්සාන් විදේශ සේවා සුභසාධක මධ්‍යස්ථාන පරිශ්‍රයේදී පැවැත්විණි. විවිධ රටවල බෞද්ධ සංස්කෘතික අංග ඇතුලත් අලංකාර පෙරහැර, කොරියානු ජාතික ස්වාමීන් වහන්සේලා සහ මහමෙව්නා අසපුවාසී පින්වත් ස්වාමීන් වහන්සේලා විසින් සිදුකල අසිරිමත් වන්දනා සහ ධර්ම දේශනා, සංගීත් විශාරද එඩ්වඩ් ජයකොඩි සහ විශාරද චරිතා ප්‍රියදර්ශනී පීරිස් දෙපල හා ඒකාත්මික වූ බැති ගී සරණිය, අලංකාර වෙසක් කූඩු ප්‍රදර්ශනය, ප්‍රයිඩ්රයිස් දන්සැල ආදී නොයෙක් ආමිස ප්‍රතිපත්ති පූජාවන්ගෙන් අලංකාර වූ මේ රමණීය පින්කම දෙස් විදෙස් බොහෝ සැදැහැවතුන්ගේ ප්‍රසාදයට බදුන්විය.
ශ්රී ලංකා මාතාවගේ මිණි කිරුළ බඳු වූ සමනොළ ගිරිහිස සුපිහිටි අප භාග්‍යවතුන් වහන්සේගේ අසිරිමත් වාම ශ්රී පාද පද්මය සිහිපත් කරවමින් ඉන්දියාවේ හිමාල ප‍්‍රදේශයෙන් හමු වූ නීල වර්ණ මාණික්‍යමය පාෂාණයක් මත පිහිටුවාලූ ජීවමාන ලෙසින් දිස්වන සිරිපා අනුරුව සහ වසර දෙදහස් ගණනක් ඉපැරණි සෑ රජාණන් වහන්සේ නමකගේ කැණීම්වලදී හමුවූ සිරිපා සලකුණු සහිත මංජුසාවක තැන්පත් ව තිබූ උතුම් ශ්රී සර්වඥ ධාතූන් වහන්සේලා වඩාහිඳුවන ලද, කඩුවෙල, මහමෙව්නාව බෝධිඤාණ භාවනා අසපු පින් බිමේ සිරි ගෞතම සිරිපා මහා විහාරය ගෞතම බුදුසසුනට පූජා කිරීමේ පුණ්‍ය මහෝත්සවය මැයි පළමුවැනි දින පවත්වන්නට යෙදුණු අතර එහිදී සිරි ගෞතම සිරිපා මහා විහාරය නිල වශයෙන් විවෘත කෙරුණේ ශ්රී ලංකා ප‍්‍රජාතාන්ත‍්‍රික සමාජවාදී ජනරජයේ අතිගරු ජනාධිපති මෛත‍්‍රීපාල සිරිසේන මහතා අතිනි.
කඩුවෙල, හේවාගම මහමෙව්නාව බෝධිඤාණ භාවනා අසපු පරිශ්‍රයේ අභිනවයෙන් ඉදිවූ සිරි ගෞතම සිරිපා මහා විහාර මන්දිරයේ තැන්පත් වන අසිරිමත් සර්වඥ ධාතූන් වහන්සේලාට උපහාර පිණිස පවත්වන අසිරිමත් සර්වඥ ධාතූ පූජා මංගල්‍යය සහ පෙරහැර අප්‍රේල් මස 28 සෙනසුරාදා සවස 4.00 සිට කඩුවෙල මහමෙව්නාව බෝධිඤාණ භාවනා අසපු පරිශ්‍රයේ දී පැවැත්විය. අති පූජනීය කිරිබත්ගොඩ ඤාණානන්ද ස්වාමීන් වහන්සේගේ අනුශාසකත්වයෙන් පැවැත්වූ මෙම උතුම් පුණ්‍යකර්මයෙන් රැස් වූ සියලු පින්, පින් කැමති සියලු දෙවිවරුන්ටත්, සිරි ගෞතම සිරිපා විහාරය තනවනු පිණිස නන් අයුරින් උපකාර කළ සියලු පින්වතුන්ටත්, දැකබලා සතුටුවන පින්වත් ඔබ සැමටත් එකසේ අනුමෝදන් වෙත්වා! මේ ගෞතම බුදුසසුන තුළදීම උතුම් ධර්මාවබෝධය කිරීමේ වාසනාව උදා වෙත්වා!
එළඹෙන වෙසක් පුන් පොහොය දිනයේදී පොල්ගහවෙල මහමෙව්නාව භාවනා අසපුවේ සීල භාවනා වැඩසටහන පැවැත්වෙන්නේ පහත පරිදි ය. එමෙන්ම වෙසක් පුන් පොහෝදා සිට මැයි 06 දින දක්වා බාල පණ්ඩිත සූත්‍රය ඇසුරෙන් නිරය සහ දෙව්ලොව පිළිබඳ තොරතුරු විදහා දක්වන විශේෂ නිර්මාණයක් ද මහජන ප්‍රදර්ශනය සඳහා සූදානම් කොට තිබේ. ඒ පිළිබඳ වැඩි විස්තර මෙම සබැඳිය ඔස්සේ දැනගත හැකිය.
මජ්ඣිම නිකායට අයත් මෙම දෙසුමෙහි ඇතුලත් කරුණු පිළිබඳ නිසි අවබෝධයක් ලබාදෙනු පිණිස යන්ත්‍රානුසාරයෙන් ක්‍රියාකරවන චලන රූපක භාවිතා කරමින් ඉතා අසිරිමත් නිර්මාණයක් එළඹෙන වෙසක් මංගල්‍යය නිමිත්තෙන් පොල්ගහවෙල මහමෙව්නාව භාවනා අසපුව මගින් ඉදිරිපත් කොට තිබේ. මෙම වෙසක් විශේෂාංගය අප්‍රේල් මස 29 වන දින වෙසක් පුන් පොහෝ දා සිට මැයි මස 06 වන දින දක්වා උදෑසන 6.00 සිට රාත්‍රී 9.30 දක්වා එම ශාලාව ඔබ වෙනුවෙන් විවෘතව පවතී.
මහමෙව්නාව භාවනා අසපු සංචිතයේ නිර්මාතෘ පූජ්‍ය කිරිබත්ගොඩ ඤාණානන්ද ස්වාමීන් වහන්සේගේ ආශිර්වාද මධ්‍යයේ ශ්රී ලංකාද්වීපයේ සිට ඕස්ට්‍රේලියාවේ මෙල්බර්න් නුවර මහමෙව්නාව භාවනා අසපු පින්බිමට වැඩමකරවන්නට යෙදුන උතුම් බෝධීන්වහන්සේ නමක් 2018-04-15 වන දින සිඩ්නි නුවර සුපිහිටි මහමෙව්නාව භාවනා අසපු පින්බිමට වැඩමකරවන්නට යෙදිණි. අලංකාර ලෙස සරසන ලද නෞකාවක වඩාහිඳුවා ධජපතාක නැංවූ මගෙහි සැදැහැවතුන්ගේ සාදුකාර මධ්‍යයේ හේවිසි හා සංඛ නාදයෙන් පුදමින් දර්ශනිය පෙරහැරකින් වැඩම කරවූ බෝධින්වහන්සේ මලින් සැරසු සොඳුරු මණ්ඩපයක තැන්පත් කෙරිණි. අනතුරුව සැදැහැ සිතින් පිළියෙල කල මල්, පහන්, ගිලන්පස ආදී සියලු පුජාවන් පුජාකරමින් සිදුකළ අසිරිමත් බෝධි වන්දනාව බොහෝ දෙනාට පිං ඵල උපදවන්නක් විය.
තිලෝගුරු භාග්‍යවත් අරහත් ගෞතම සම්මා සම්බුදුරජාණන් වහන්සේගේ උතුම් ත්‍රෛමංගල්‍යය සිහිකරමින් අපගේ භාග්‍යවතුන් වහන්සේගේ අපරිමිත ගුණස්කන්ධයට උපහාර පිණිස නා නා විධ ආමිස සහ ප්‍රතිපත්ති පූජෝපහාර පැවැත්වීමත් දහස් සංඛ්‍යාත සැදැහැතියන්ගේ සිත් තුළ බුද්ධ, ධම්ම, සංඝ යන ත්‍රිවිධරත්නය කෙරෙහි පහන් සිතිවිලි ඇති කරලීමත් පිණිස මාතර, උඩඅපරැක්ක මහමෙව්නාව මහා විහාරයේ ද දින 5ක් පුරා විශේෂ පින්කම් මාලාවක් සංවිධානය කොට තිබේ.
ශ්රී බුද්ධ වර්ෂ 2562 වෙසක් පුන් පොහොය නිමිති කරගෙන කුණ්ඩසාලේ මහමෙව්නාව භාවනා අසපුවේ අප්‍රේල් මස 21 වන දින සිට 29 වනදා දක්වා ත්‍රිපිටක සජ්ඣායනාවක් ද ඇතුලුව විශේෂ පින්කම් මාලාවක් සංවිධානය කොට තිබේ. මින් වසර 2607 කට පෙර දඹදිව බුද්ධගයාවේ වජිරාසනය මත වැඩහිඳිමින් උතුම් සම්මා සම්බෝධිය සාක්ෂාත් කළ අපගේ මහාමුනීන්ද්‍රයන් වහන්සේ විසින් පන්සාලිස් වසරක් මුළුල්ලෙහි දෙව් මිනිස් ලෝ සතුන් කෙරෙහි අපමණ කරුණාවෙන් දේශනා කොට වදාළ නෛර්යාණික ශ්රී සද්ධර්මයෙහි ඇතුලත් ඒ ඒ නිකායන්ට අයත් සූත්‍ර දේශනා සතියක් පුරා එම උතුම් පින්බිමේදී බුද්ධ භාෂාවෙන් ම සජ්ඣායනා වනු ඇත. එහි කාලසටහන පහත අමුණා තිබේ. එමෙන්ම එම සතිය පුරා සෑම දිනකම රාත්‍රී 7.00 සිට 8.30 දක්වා ධර්ම දේශනාවක් පැවැත්වෙන අතර එම දිනවලදී කුණ්ඩසාලේ මහමෙව්නාව භාවනා අසපුවට පැමිණීමෙන් එම උතුම් සදහම් ශ්‍රවණය කරන්නටත් සජ්ඣායනා කරන්නටත් ඒ තුලින් උතුම් පින් රැස්කරගැනීමටත් මහඟු අවස්ථාවක් උදාවී ඇත. මීට අමතරව වෙසක් පුන් පොහෝ දින උදෑසන 6.00 සිට පසුදා පහන්වන තුරු සීල භාවනා වැඩසටහන පැවැත්වෙන අතර එදින දහවල් 1.00 ට පූජ්‍ය කිරිබත්ගොඩ ඤාණානන්ද ස්වාමීන් වහන්සේ විසින් සුමධුර ධර්ම දේශනයක් ද පැවැත්වීමට නියමිත ය. ලද දුලබ මිනිස් දිවිය තුල තෙරුවන් සරණ ගිය ශ්‍රාවකයන් ලෙස තම ජීවිතයට අපමණ පින්ඵල නෙළාගනු පිණිසත් අපගේ භාග්‍යවතුන් වහන්සේගේ උතුම් සම්බුදු තෙමඟුල අර්ථවත්ව සැමරීම පිණිසත් මෙම පින්කම් මාලාවට සම්බන්ධ වන ලෙස මහනුවර ප්‍රදේශයේ වෙසෙන ඔබ සැමට මෙත් සිතින් ආරාධනා කර සිටිමු.
“දසබලසේලප්පභවා නිබ්බානමහාසමුද්දපරියන්තා
අට්ඨංගමග්ගසලිලා ජිනවචනනදී චිරං වහතූති.”
“දසබලයන් වහන්සේ නමැති ශෛලමය පර්වතයෙන් පැන නැගී, අමා මහ නිවන නම් වූ මහා සාගරය අවසන් කොට ඇති, ආර්ය අෂ්ඨාංගික මාර්ගය නම් වූ සිහිල් දිය දහරින් හෙබි, උතුම් ශ්රී මුඛ බුද්ධවචන ගංගාවෝ (ලෝ සතුන්ගේ සසර දුක නිවාලමින්) බොහෝ කල් ගලා බස්නා සේක්වා!”
මහමෙව්නාව භාවනා අසපුව,
වඩුවාව, යටිගල්ඔලුව,
පොල්ගහවෙල.
මෙම වෙබ්අඩවියේ පළවන නවතම තොරතුරු ඔබගේ ඊමේල් ලිපිනය වෙත ගෙන්වා ගැනීමට පහත පෝරමය පුරවා ලියාපදිංචි වන්න.
© 1999 – 2025 Mahamevnawa Buddhist Monastery | Terms of Use
